Барномаи давлатии рушди пахши телевизиони рақамӣ дар Ҷумҳурии Тоҷикистон барои солҳои 2020-2024

0
360

Замимаи 1

Бо қарори Ҳукумати

Ҷумҳурии Тоҷикистон

аз “30” авгутси соли 2019, № 437

тасдиқ шудааст

Барномаи давлатии рушди пахши телевизиони рақамӣ дар Ҷумҳурии Тоҷикистон барои солҳои 2020-2024

  1. МУҚАРРАРОТИ УМУМӢ
  2. Барномаи давлатии рушди пахши телевизиони рақамӣ дар Ҷумҳурии Тоҷикистон барои солҳои 2020-2024 (минбаъд – Барнома) ба муайянсозии ҳадафҳо, афзалият ва тадбирҳо ҷиҳати ташаккул ва рушди телевизиони рақамӣ дар Ҷумҳурии Тоҷикистон нигаронида шуда, бо мақсади амалисозии Консепсияи сиёсати давлатии Ҷумҳурии Тоҷикистон дар соҳаи телевизион ва радиошунавонӣ барои солҳои 2010-2025, ки бо қарори Ҳукумати Ҷумҳурии Тоҷикистон аз 1 октябри соли 2009, №529 тасдиқ шудааст, таҳия гардида, амалигардонии онҳо барои ҳалли вазифаҳои муҳими ислоҳоти соҳаи телевизиони Тоҷикистон дар ҷаҳони муосир мусоидат менамояд.
  3. Барнома ба меъёрҳои Конститутсияи Ҷумҳурии Тоҷикистон асос ёфта, ҳадафҳо, афзалият ва тадбирҳоро оид ба ислоҳот ва рушди телевизиони рақамӣ муайян менамояд.
  4. Барнома ба рушди пахши телевизион ва дар ин замина ба таъмини ҳуқуқу озодиҳои конститутсионии инсон ва шаҳрванд, дастрасии баробар ба иттилоот, истифодаи босамари мероси фарҳанги миллӣ, суннатҳои таърихӣ, риояи меъёрҳои ҳаёти иҷтимоӣ, ҳифзи арзишҳои ахлоқӣ, тарбияи ватанпарастӣ ва таъмини амнияти иттилоотии кишвар равона шудааст.
  5. Бо ташаккули бастаи иҷтимоии аввал шабакаҳои телевизионӣ дар ҳамкорӣ бо ҷамъияти саҳомии кушодаи “Телерадиоком” имкони ворид шуданро ба бастаи иҷтимоӣ доранд. Танҳо дастрасии шабакаҳо то маркази интиқоли мавҷ аз ҷониби фармоишгар таъмин карда мешавад.
  6. Амалӣ гардидани Барнома аҳолиро бо пахши бисёршабакавии рақамӣ ва пешниҳоди босифати кафолатноки шабакаҳои ҳатмии телевизионии дастраси умум таъмин менамояд. Ин имконият медиҳад, ки ҳуқуқҳои конститутсионии шаҳрвандон барои гирифтани иттилоот таъмин карда шавад.
  7. Муайян намудани самти рушди пахши рақамӣ, ташкил кардани механизми маблағгузории он ва тавсеаи шабакаҳои ҳатмии телевизионии дастраси умум, ташкили воҳиди сохтории зарурӣ барои пахши телевизиони рақамӣ имконият фароҳам меорад. Он боис мешавад, ки роҳҳои интихобии фаврии дастрасии аҳолӣ ба иттилоот имконпазир гардида, амнияти иттилоотии кишвар таъмин карда шавад.
  8. ВАЗЪИ ИМРЎЗАИ СОҲА ВА САМТҲОИ АСОСИИ РУШДИ ОН
  9. Айни замон дар натиҷаи амалишавии Барномаи давлатии рушди пахши телевизиони рақамӣ дар Ҷумҳурии Тоҷикистон барои солҳои 2010-2015, фарогирии аҳолии ҷумҳурӣ бо барномаҳои пахши рақамии телевизион 60,41 фоизро ташкил медиҳад.
  10. Ҳоло дар ҳудуди шаҳри Душанбе, марказҳои вилоятҳои ҷумҳурӣ ва баъзе маҳалу марказҳои шаҳру ноҳияҳои кишвар фиристандаҳои рақамии ҷамъияти саҳомии кушодаи “Телерадиоком” барои пахши барномаҳои “Телевизиони Тоҷикистон”, муассисаҳои давлатии “Телевизиони Сафина”, “Ҷаҳоннамо”, “Телевизиони кўдакону наврасон “Баҳористон”, телевизионҳои “Варзиш”, “Синамо” ва мусиқии Тоҷикистон “Шаҳнавоз” насб карда шудаанд.
  11. Мувофиқи низоми мавҷудаи Кумитаи телевизион ва радиои назди Ҳукумати Ҷумҳурии Тоҷикистон таъмини фазои иттилоотии кишвар бо барномаҳои давлатии телевизион ва радио тавассути воситаҳои техникии пахши рақамӣ ва ғайриоддӣ амалӣ шуда истодааст.
  12. Вазифаҳои асосии Кумитаи телевизион ва радиои назди Ҳукумати Ҷумҳурии Тоҷикистон ҷиҳати таъмини пахши рақамӣ аз инҳо иборатанд:

– фароҳам овардани шароит барои таъмини аҳолии ҷумҳурӣ бо иттилооти фаврӣ, боэътимод ва аз ҷиҳати иҷтимоӣ муҳим;

– ташкили шароит барои рушди пахши телевизиони рақамӣ;

– муҳайё намудани заминаи гузариш ба телевизиони дақиқияти баланд (HD);

– таъмини фаъолияти барсохтори пахши ғайриоддӣ (аналогӣ) дар маҳалҳо то гузариши пурра ба технологияи рақамӣ;

– муайян намудани реҷаи марҳила ба марҳила аз истифода баровардани фиристандаҳои пахши ғайриоддӣ (аналогӣ) дар ҳудуди ҷумҳурӣ.

  1. РОҲҲОИ АМАЛИСОЗИИ БАРНОМА
  2. Барнома бо роҳҳои зерин амалӣ карда мешавад:

– фароҳам овардани шароити мусоиди дастгирии молиявии давлатӣ зимни тартиб додани нақшаҳои дурнамо;

– ҳамоҳангсозии фаъолияти мақомоти марказӣ ва маҳаллии ҳокимияти давлатӣ ҷиҳати дастгирӣ ва мусоидат баҳри амалисозии Барнома;

– ҳамоҳангсозии басомадҳои фиристандаҳо дар минтақаҳои наздисарҳадӣ бо ҷумҳуриҳои ҳамсоя аз ҷониби мақомоти дахлдор.

  1. МАРҲИЛАҲОИ АМАЛИСОЗИИ БАРНОМА
  2. Амалисозии Барнома дар давоми 5 сол ба нақша гирифта шудааст ва он аз 5 марҳила (тибқи нақшаи чорабиниҳо) иборат аст. Фиристандаҳои пахши телевизионӣ то бапуррагӣ насб шудани фиристандаҳои пахши телевизиони рақамӣ дар якҷоягӣ истифода хоҳанд шуд.
  3. Марҳила ба марҳила иҷро намудани Барнома вобаста ба маблағгузорӣ ва имкониятҳои молиявӣ ба зиммаи ҷамъияти саҳомии кушодаи “Телерадиоком”-и Кумитаи телевизион ва радиои назди Ҳукумати Ҷумҳурии Тоҷикистон вогузор шудааст. Ҷамъияти саҳомии кушодаи “Телерадиоком” насби фиристандаҳои рақамӣ ва корҳои дигари заруриро ҷиҳати амалисозии Барнома иҷро менамояд.
  4. САРЧАШМАҲОИ МАБЛАҒГУЗОРӢ
  5. Ҷиҳати амалӣ намудани Барнома сарчашмаҳои гуногуни маблағгузорӣ ва имкониятҳои иқтисодию ташкилӣ истифода бурда мешаванд, аз ҷумла:

– маблағгузорӣ аз буҷети давлатӣ барои рушди ташкилотҳои тобеи Кумитаи телевизион ва радиои назди Ҳукумати Ҷумҳурии Тоҷикистон;

– маблағгузорӣ аз ҳисоби даромадҳои Кумитаи телевизион ва радиои назди Ҳукумати Ҷумҳурии Тоҷикистон ва ҷамъияти саҳомии кушодаи “Телерадиоком”;

– маблағгузорӣ аз ҳисоби грантҳо, манбаъҳои дигари молиявӣ ва шаклҳои дастгирие, ки тибқи қонунгузории Ҷумҳурии Тоҷикистон манъ карда нашудаанд.

  1. Мақомоти иҷроияи ҳокимияти давлатии вилоятҳо ва шаҳру ноҳияҳои ҷумҳурӣ барои пахши рақамӣ дар ҳудуди марзию маъмурии дахлдор бинои техникӣ ва хатти интиқоли барқро тибқи стандартҳо ва талаботи истифодабарии техникӣ барои фиристандаҳои рақамӣ, мувофиқи пешниҳоди ҷамъияти саҳомии кушодаи “Телерадиоком” бунёд ва мавриди истифодабарӣ қарор дода, нигоҳубини ҳолати онро таъмин менамоянд.
  2. Мақомоти иҷроияи ҳокимияти давлатии вилоятҳо ва шаҳру ноҳияҳои ҷумҳурӣ дар ҳудуди марзию маъмурии дахлдор оилаҳои камбизоатро бо рамзкушоҳо ройгон таъмин менамоянд.
  3. НАТИҶАҲОИ ЧАШМДОШТ
  4. Дар натиҷаи амалишавии Барнома як қатор натиҷаҳои аз лиҳози иқтисодӣ, иҷтимоӣ ва сиёсӣ манфиатнок ба даст меояд, аз ҷумла:

– фароҳам омадани шароит барои таъмини амнияти фазои иттилоотӣ;

– дастрасии аҳолӣ ба шумораи зиёди шабакаҳои телевизионӣ;

– таъмини сифати баланди тасвир ва овоз барои тамошобинон;

– фароҳам омадани шароит барои қабули як барномаи телевизионӣ бо якчанд забон мувофиқи хоҳиш ва завқи тамошобин;

– сарфаи қувваи барқ;

– сарфаи басомад;

– фароҳам омадани шароити қабули мавҷи пахши телевизиони рақамии ҷумҳурӣ дар минтақаҳои наздисарҳадӣ барои ҳамватанон ва ҳамзабонони бурунмарзӣ;

– фароҳам омадани шароит барои гузариши пахши дорои дақиқияти баланд (HD).

Замимаи 2